لا تحلفْ··· ولا نحلفْ
ولا تقْسم برب الكونْ
حقيقه واضحه والله
وترى لكل العباد اعيون
لا تقْسمْ·· ولا نقْسمْ
تعال وخلنا نقعد
نقسِّم لك على "القانون"!
وخلْنا "اندوزن" أوتاره
إذا كلٍ نسى نفسه·· وقضب طاره·· بحفلة زار
وراح ايحمّي زيرانه على ناره·· وبقلبه نار!
إذا راعي "الكلك" ساوم وزاد النوط·· سمساره!
يغني لك·· يموِّل لك
وعينه - لو علا صوته - على الدينارْ!
أبد·· ما ينفعك سمسارْ
رخيص·· وما وفا لداره
تعرّى·· وبالملا مفضوح
عجيبه اشلون يطربكم
غنا·· من صوته المبحوح
* * *
لا تقسم·· ولا نقسم
تعال وخلنا نقسّم على "القانون"!
ترى بعض الحچي واضح
وبعضه يخفي أسراره
وباقي للحديث اشجونْ!
يبيع النفس من فكّر
يساومكم على هالصوت
رخيص وما وفا لداره!
ذليل وخانته نفسه
على درب الزلل ماشي
وطبع النفس·· أمّاره··!!
* * *
إذا قلبك على الديره·· وتمنى أن تُصان احقوق
إذا ودك بتسترها·· اتخيّط ثوبها المشقوق!
إذا ودك نعريهم
ونفضح نية الشاري
ونكشف حسبة البايع·· ومن باع الذمم بالسوق
إذا ودك··
إذا ودك··
تعال نوضح الخافي
وخلنا نكسر "الصندوق"
وضّاح
