|
|
|
|
نجمه في عيوني اتْضوي
أشعلت ليل السهارى
هي ربيع الروح ورّد
وازهر ابقلبي خضاره
هي براد الفي·· لما
نشتكي لفح الحراره
تبسط اكفوف وبسايل
فوق رمضتنا ستاره
في خليج الملح·· عذبه
وفي لياليهم·· مناره
* * *
حلوه اعيونج يا سمرا
وودنا نسمع ابشاره!!
عن شراعج وين غرّب
ووين يب يوصل مساره؟!
كلها أيام·· انتشوق
ها البلد يرسي قراره
نبي من يصلح خرابه
ما يزيده في دماره
وما نبي منهو يدّجل
ماخذ الكرسي تجاره!
أربع اسنين و"يملين"
في رصيده ·· في عقاره!
يملك ابيوت ومزارع
وكان ما يملك عماره!!
وما نبي العضو اللي ينصب
لحيته إهيا شعاره
"يطبطب" اظهور الخلايق
والكذب عنده شطاره
يحبس الشمس بيدينه
عنّا·· ما "يفرج نهاره"!
وينثر "العدوى" علينا
أمراض·· ويشيّع دماره
وما نبي العضو اللي خاضع
ما درى·· لا وين داره
عضو سكّانه الحكومه
قررت تسحب قراره
* * *
حلوه اعيونج يا سمرا
بس لو نسمع ابشاره؟!
يا ربيع الروح ورِّد
وازهِر ابقلبي خضاره!
وضاح
هيستنغز - المملكة المتحدة |
|
طباعة |
|
|
|
