شنبي لمّا يطول الليل ويخيّم
ولا نلقى قمر ضاوي
ولا نجم بزوايانا
ولا شمعه امْتَلَتْ بالشوق سهرانه؟!
***
شنبي·· لما السحاب يمر
ما يمطر
على أغلى ثرى··
ويروح ويسمِّر··
وتبقى الروح··· عطشانه؟!
***
شنبي·· وكلمة "حكم" و"إصلاح"
تثير اجراح·· وتزعِّلْ
يطيِّرها الغضب / اعصار
ليمن دار·· ما يخلّي
سوى برقْ ورعدْ ونفوسْ زعلانه؟!
***
شنبي وهذا البحر مهموم ما يدري
بحشاشة جوفه الأزرق
تنام وتهتني الدانة!
***
شنبي منّك؟؟!
نبي منّك:
1 - عدالة موزَّعة بالدار
ما تعرف ابن أو عمْ
ما تعرف قرابه·· ودمْ
علينا نقبل أحكام العدل هذا··· وعليك تشيل ميزانه·
***
نبي منّك:
2 - "حكم دستور" واضح بالكتب مشروح
ما نسمح يمسَّه شي
ولا تسمح بنقصانه!
***
نبي:
3 - تحفظ لنا الخيرات ما تنباقْ
وترى ذيچ "الحقول" مأمّنه عندك·· "شمال" الروح
لا تسمح يهرّبها - بعتمة ليلنا - دلاّلْ
ويعرضها على الأسواق
ياخذ أبخس أثمانه!
***
نبي منّك:
4 - تخلّي كلمة "الإصلاح"
حقيقة تنزرع بالدار
مثل رش المطر يحيي صفار العود
والنوّير
إذا فيّض بغدرانه
***
تبي نكرّر مطالبنا "شنبي منّك"؟
نبي منّك:
صدر واسعْ
حكم قانونْ
عداله كامله ودستور
ووعد صادقْ·· نبي ننطر محاصيله
إذا اللّه سبحانه
·· الى يوم الوعد هذاك أحيانا؟!