مسفر الدوسري
الحق واضح··
على لبنان !!
كيف تتجرأ زهرة ليلك
تتنفس بين الأكفان
كيف تتمرد هذي الزهره
في كل مره
رغم الدمار في كل مره
وتبعثر عطر وألوان!
هالزهره هذي المجنونه
دايم تصحى كل ما ماتت
وتتحدى رغبة قاتلها
ولاتؤمن
كل ما عليها ···فان!
أبداً··
كل شي يفنى فيها· · تعيده
وتبقى الروشه
وقهاويها
والحريه
وصوت فيروز
والموسيقى · · فـ الشوراع
والبنات الحلوه جداً
والأناقه
والوسامه
بهالشبان·
أبدا ترفض هذي الديره
إن اللي عليها ····فان!
مجنونه جداً لبنان
غلطانه جداً لبنان
كيف حزب الله
يتحدى هذا العدوان
كيف يحاول
يستنفر نخوة هالناس
ضد الظلم وضد الخيبه والطغيان
كيف يورِّط كل الأمه
في حرب ·· ومحسومه سلفاً
ومعروف منهو فيها الرابح
ومنهو بيكون الخسران؟!!!
كيف حزب الله على كيفه
يجي ويحرّك الساكن
ويلوّن بقلوبنا الداكن
كيف يستنهض كرامتنا
ويخلي العزه عنوان؟!!!
وشلون سماحة السيد
ما يشاورنا
وما يسألنا
قبل ما يهز الخوف فينا
ويصحّي فينا الإيمان!
يامولانا··
لا تآخذني··
فيه ناس تموت·· لجل تحيا··
وفيه ناس تحيا·· لجل تموت··
والفرق مابينهم ··شتان!
لما قرّرت تحررنا من خيبتنا
مدري هالموضوع كان في بالك
واعتبارك · · والحسبان؟!!
فيه شي ثاني ياسيدنا:
إنتوا شيعه
وحنا سنّه
يعني مثلاً
مثلاً ·· مثلاً
لو صمدتوا
وانتصرتوا
منهو يعطينا الضمانه ··ماتحتلنا إيران؟!!
·······
··········
شفت شلون بس يامولانا
التفكير في عالمنا··· جنان!!
حنا في عالمنا العربي
يهمنا تصنيفنا للدم
مهو مهم الإنسان!!
تجي تقول الدم واحد
والشعب واحد
والحق واحد
يامولانا لاتآخذني
أرجوك أرجوك لاتآخذني
أنا أظنك غلطان!!
يعني بالله منهو يقبل
تصير هالحرب المجنونه
عشان قطعة أرض أُحْتلَّت
ولاّ كرامه مهدوره
وكلام فاضي
ولاّ أسرى صاروا "مُلصق"··
ومعلّق على الجدران؟!!!!!
لا تآخذني ياسيدنا
وش تعني مزارع "شبعا"؟!
وشنهو يعني شوية أسرى؟!
حنا بعد لنا أسرى
ما حاربنا
وماقاومنا
وماقوّمنا كل هالدنيا
وازعجنا الأمم المتحده
والسيد "كوفي عنان"!!
بالعكس·· قلنا: ·· كله واحد··
هالأسرى فدوه للأمه
فدوه للسلم وأحبابه
فدوه لعيون الطمأنينيه
فدوه للأمن ··والأمان!!!
يعني شنهو شوية اسرى؟!
خلهم أسرى لما يموتوا
ولو هم ماتوا··
ماراح حتى نطالب فيهم
إذا الأحياء فينا موتى
وش راح ينفعنا الجثمان؟!!!!
لبنان ينـزف حتى الموت
والقاتل معروف: حزب الله
والضحيه من دون شك:
أمريكا· · حزب الشيطان·
والحق واضح··
على لبنان!!
حتى أطفال الجنوب
باعتقادي غلطانين
يعني أصلاً·· ليش انولدوا؟!
أو·· لما انولدوا··
ليش ما انولدوا··· وهُم كْبار؟!
عشان لما يصير القصف
نار ··وبارود·· ودخان··
مايشوهون جمال الصوره
بالطفوله··والبراءه···
ولحم مشتت ··قطعه قطعه··
واحلام ماتت
حتى من قبل ماتبان·
يعني أطفال الجنوب
ركن اساسي··
فـ اللي كان!!
لا يحاول أحّد يقنعني
الحق واضح··
واضح جدا
على حزب الله
وعلى لبنان!!!
الله··· ياغباء المنطق··
قدّام ذكاء الأحزان!!
